Mintzapraktika
Mintzapraktika duela 30 urte baino gehiago jarri zen martxan lehenengoz Donostian, Bagera elkartearen eskutik. Ordutik, milaka dira urtero egitasmo honetan parte hartzen duten pertsonak. Helburu oso ezberdinak dituzte, batzuek euskaraz hitz egiteko aukerak eta guneak bilatzen dituzte, beste batzuek, euskara praktikatzeko nahia dute eta askok, harreman berriak euskaraz sortzea nahi dute. Euskara da beraz, pertsona guzti hauek batzen dituena.
Nola funtzionatzen du?
Mintzapraktikaren funtzionamendua oso sinplea da: euskara praktikatu nahi duen lagun talde bat haiekin euskaraz aritzeko prest dagoen pertsona batekin elkartzen da, horixe baita mintzapraktika egitasmoen helburua: euskaraz aritzeko guneak eskaintzea. Normalean, maiztasuna asterokoa izaten da, baina badaude beste maiztasun batez elkartzen diren taldeak ere, hala nola, bi astean edo hilabetean behin.
Mintzapraktika modu askotan egin daiteke: kafe baten bueltan, paseoan, mendian, josten… Azken urteetan ugaritzen joan dira zaletasunei lotutako taldeak, hizkuntzaren praktika gure eguneroko jardueretan txertatzeko aukera emanez.
Mintzapraktika, euskararen aldeko aktibismoa
Euskararen alde aktibatzeko hainbat modu ezberdin daude eta horietako bat da, hain zuzen, Mintzapraktika. Parte hartzaileek modu boluntarioan eta bere denbora eta gogoa eskainiz, ekarpen oso garrantzitsua egiten diote euskararen biziberritze prozesuari. Euskaraz lasai aritzeko guneak eskaintzen ditu, poliki-poliki hiztun berriei erabilerarako pausua emateko beharrezko babes eta konfiantza hori eskainiz. Mintzapraktika izan daiteke zure eragiteko aukera!
Non egin dezaket Mintzapraktika?
Ondorengo mapan aurkituko dituzu herriz-herri martxan dauden Mintzaprakika egitasmoak.
